QƏLBİMİZDƏ YAŞAYANLAR

Vətən -məndən,səndən,bizdən başlanır.Vətən o zaman vətəndir ki,onu sevəsən,əzizləyəsən və qoruyasan.
Vətən oğullarının qəhramanlıqlarından dastanlar yazılır,tarixə dönür. 25 may 2023-cü il tarixində vətənpərvər şairə Esmira Günəşin Cəlilabad rayonu Heydər Əliyev Mərkəzində "Qəlbimizdə yaşayanlar" kitabının təqdimatı olub. Tədbirdən öncə bölgələrdən gələn şəhid anaları şairə Esmira Günəşlə birlikdə şəhid Fizuli Həbibinin ev muzeyini, bulağını, məzarını və Fəxri xiyabanı ziyarət ediblər. Daha sonra qonaqlar Cəlilabad rayon Heydər Əliyev mərkəzinə üz tutaraq tədbirdə iştirak ediblər. Tədbirdə Cəlilabad rayon şəhid ailələri ilə yanaşı Bakı Sumqayıt İsmayıllı, Astara və Kürdəmir rayonundan şəhid ailələri də iştirak edib. Həmçinin Cəlilabad rayon İcra nümayəndələri, rayon təhsil idasəsindən nümayəndələr, rayonun Gənclər və idman idarəsinin nümayəndəsi, rayon ədəbi mühitinin nümayəndələri, məktəblilər, kollec və universitet tələbələri, eləcə də Cəlilabad rayon uşaq incəsənət məktəbinin müəllim və şagird kollektivi iştirak ediblər. Tədbir bir-birindən maraqlı çıxışlarla davam etdiyi zaman şairə Esmira Günəş məktəblilərin vətənpərvərlik ruhunda yetişdirilməsində gördüyü işlərə görə rayon Gənclər və idman idarəsi tərəfindən Fəxri Fərmanla təltif olunub. Tədbirə gələn qonaqlar isə şəhid ailələri tərəfindən hədiyyələrlə qarşılanıblar. Tədbirin gedişatında Sumqayıt şəhidlərindən şəhid Rüfət Mustafayevin anası Afət xanımın ad günü qeyd olunub. Sonda isə şairə Esmira Günəş tədbirin təşkil olunmasında əziyyəti böyük olan şəhid Fizuli Həbibinin anası Natəvan xanıma, atası Nizami bəyə və Cəlilabad rayon Gənclər Mərkəzininin rəhbərliyindən Qənimət xanıma təşəkkürünü bildirib. Onu da qeyd edək ki, tədbirdə təqdimatla yanaşı şəhidlərin şəkillərinin sərgisi də təşkil olunub. Tədbir Xatirə şəkilləri ilə sonlandırıldıqdan sonda qonaqlar birlikdə Şəhidlər Xiyabanını ziyarət ediblər.
Torpaq üçün can verən oğullarla qürur duyuruq.
Uğur yolu
Şəbnəm