İkinci Vətən Müharibəsi Şəhidi, ali təhsilli, ailənin tək övladı, anası tərəfindən təkbaşına böyüdülən Leytenant, bir neçə medal və ordenli Samir Əliyevin Cənnətdəki üçüncü doğum günü, 24 yaşının tamam olması ilə bağlı bu gün-9 avqust 2023-cü il tarixində, səhər saatlarında İkinci Fəxri Xiyabanda məzarı ziyarət olunub.

UgurYoluTv.az xəbər verir ki, öncə Şəhidin və cəmi Şəhidlərin xatirəsi bir dəqiqəlik sükutla yad olunub, Müdafiə Nazirliyinin Hərbi orkestri tərəfindən Dövlət himni səsləndirilib.

Sonra qısa çıxışlar edilib.

Polkovnik, şair Abdulla Qurbani, Suraxanı rayon İcra Hakimiyyətinin rəsmisi çıxışlarında Şəhidin keçdiyi qısa, çətin, lakin şərəfli 21 illik həyat, hərb və döyüş yolundan bəhs ediblər.

Şəhidin anası Sevda xanıma və nənəsi Cəmilə xanıma Allahdan səbr və dözüm diləyiblər, Samir Əliyevin Onsuz qeyd edilən Cənnətdəki üçüncü doğum gününü təbrik ediblər.

Daha sonra Şəhidin məzarı ziyarət olunub.

Məzarı üzərinə gül dəstələri düzülüb, əklil qoyulub, ruhuna dualar edilib, Quran oxunub.

Ziyarətdən sonra isə İkinci Fəxri Xiyabanda yerləşən mərasim zalında mərasim düzənlənib, yenə qısa çıxışlar edilib, bir daha Samir Əliyevin İgidliyi və Qəhrəmanlığından söz açılıb.

Məkanı cənnətlik, Cənnətdəki üçüncü doğum günü mübarək olsun!