Esmira Günəşin Dilman kəndində kitab təqdimatı keçirilib

Şəhid Bəhruz Nəsirov adına Dilman kənd tam orta məktəbdə şəhid Tacəddin İsmayılzadənin xatirəsinə həsr olunmuş tədbir keçirilib. Tədbirdə şairə Esmira Günəşin kitablarının da təqdimatı olub. Qonaqlar əvvəlcə məktəblə tanış olub. Şəhidlərin adlarını daşıyan sinif otaqlarını ziyarət ediblər. Tədbir Azərbaycan Respublikasının Dövlət Himni və şəhidlərimizin bir dəqiqəlik sükutla yad olunması ilə açıq elan olunduqdan sonra çıxış üçün ilk söz məktəbin direktoru Cəmalə müəlliməyə verilib. Müəllimə çıxışı zamanı qeyd edib ki, məktəbin bütün sinifləri şəhid adları daşıyır. Ağsunun üç kəndinin 16 şəhidi məktəbdə daimi yad olunur. Bunlardan əlavə məktəb kollektivi olaraq şəhidlərin tədbirlərində aktiv iştirak edərək, tez-tez ailələrini də ziyarət edirlər. Daha sonra sıra ilə qonaqların maraqlı çıxışları olub. Tədbirdə şagirdlər şairə Esmira Günəşin şəhidlərə həsr etdiyi şeirlərdən səsləndirib. Şairə xanım isə öz çıxışı zamanı şəhid Tacəddin İsmayılzadənin anası ilə birlikdə gətirdikləri hədiyyələri məktəbn direktoru təqdim ediblər. Hədiyyələrdən əlavə şairə Esmira Günəş şəhid Tacəddin İsmayılzadə haqqında yazılarının yer aldığı, Təbrizdə çap olunan "Torpağın aşiqləri" kitabını və "Uğur yolu TV" jurnalını şəhidin anası Aygün xanıma təqdim edib. "44 günün Sumqayıt qəhrəmanları" kitabını isə məktəbin kitabxana fonduna hədiyyə edərək bildirib ki, tədbirin təşkilatçısı Ülviyyə müəllim şəhid qardaşı Cəbrayıl Xəlilov da növbəti kitabında yer alacaq. Tədbir xatirə şəkilləri ilə yekunlaşdırıldıqdan sonra qonaqlar məktəbin həyətində yer alan şəhidlərə həsr olunmuş abidəni ziyarət ediblər.
Şəhla Hüseyinova